“Student Organizations – Weekend” və “Student Clubs – Weekend” adlı həftəsonu düşərgə təlimləri keçirilib.
Azərbaycan Respublikası Gənclər və İdman Nazirliyinin və Gənclər fondunun dəstəyi, Tələbə gənclər təşkilatları ittifaqının təşkilatçılığı ilə 1-3 dekabr tarixlərində Ağcabədi Olimpiya İdman Kompleksində paralel olaraq “Student Organizations – Weekend” və “Student Clubs – Weekend” adlı həftəsonu düşərgə təlimləri keçirilib.
Layihənin ilk günündə Azərbaycan Respublikası Gənclər və İdman Nazirliyinin, rayon icra hakimiyyətinin, tələbə gənclər təşkilatları ittifaqının, Ağcabədi Olimpiya İdman Kompleksinin vəzifəli şəxsləri, 20-dən çox ali və orta ixtisas təhsil müəssisəsində oxuyan tələbə klublarının rəhbərləri və media nümayəndələri iştirak ediblər.
Azərbaycan Tələbə Gənclər Təşkilatları İttifaqının Beynəlxalq əlaqələr üzrə meneceri Aysun Məmmədova tədbiri açıq elan edib, ilk öncə Azərbaycan Respublikasının Dövlət Himni səsləndirilib, Ulu öndərin və torpaqlarımızın ərazi bütövlüyü, suverenliyi uğrunda qəhrəmanlıqla həlak olan şəhidlərimizin əziz xatirəsi dərin ehtiramla yad olunub. Açılışdan sonra panel müzakirə baş tutub.
Müzakirə zamanı Azərbaycan Respublikası Gənclər və İdman Nazirliyinin Gənclərlə iş sektorunun müdiri Elnur Abdullayev “Gələcək tendensiyalar və çağırışlar: gənclərin liderliyi barəsində gələcək tendensiyalar və çətinliklər, onlara hazırlaşmağın mümkün yolları” mövzusunda çıxış edib, tələbələrin ünvanladıqları sualları cavablandırıb.
Daha sonra rayon icra hakimiyyəti başçısının müavini Vüsalə Məmmədova, tələbə gənclər təşkilatları ittifaqının Klublarla iş üzrə meneceri Aqil Quliyev müxtəlif universitetlərdə təhsil alan tələbələrin Ağcabədidə baş tutan görüşdə bir araya gəlməsini müsbət qiymətləndirərək, bu cür səmərəli görüşlərin davamlı olmasını eyni prinsipə xidmət edən tələbələrin gələcəkdə birlikdə görəcəkləri işə yaxşı təsir edəcəyini bildiriblər.
Sonda xatirə fotoları çəkilib.
Bildirək ki, bu cür düşərgələrin keçirilməsinin əsas məqsədi ali və orta ixtisas təhsil müəssisələrində fəaliyyət göstərən tələbə gənclər təşkilatları sədrləri, klublar və üzvləri üçün təşkilati idarəetmə sahəsində təlimlərin təşkili və asudə vaxtlarının səmərəli təşkilinin təmin olunmasıdır.
