Minəxorlu kəndinin Qarqar çayı sahilində ənənəvi təmizlik aksiyası keçirilib.
Ekologiya və Təbii Sərvətlər Nazirliyinin və Ağcabədi Rayon İcra Hakimiyyətinin təşəbbüsü və birgə təşkilatçılığı ilə iyun ayının 10-da “5 iyun – Ümumdünya Ətraf Mühitin Mühafizəsi Günü” ilə əlaqədar Minəxorlu kəndinin Qarqar çayı sahilində ənənəvi təmizlik aksiyası keçirilib.
Aksiyada Ağcabədi Rayon İcra Hakimiyyətinin məsul işçiləri, 9 saylı Regional Ekologiya və Təbii Sərvətlər idarəsinin və digər qurumların əməkdaşları, Ağcabədi Rayon İcra Hakimiyyətinin inzibati ərazi dairələri üzrə nümayəndələri və bələdiyyələr, yerli sakinlər, könüllülər, eləcə də sosial işçilər iştirak ediblər.
Görüşdə çıxış edən rayon icra hakimiyyətinin Sosial-iqtisadi inkişafın təhlili və proqnozlaşdırılması şöbəsinin müdiri Toğrul Bünyadov və 9 saylı Regional Ekologiya və Təbii Sərvətlər idarəsinin rəisi Oqtay Şahmurov belə təmizlik aksiyalarının müntəzəm keçirilməsinin vacibliyini, eləcə də ölkədə və regionda əhali tərəfindən ekoloji təmizliyə riayət olunmasının lazım olduğunu bildiriblər.
Tədbir zamanı zəruri sanitar avadanlıqlarla təchiz olunmuş aksiya iştirakçıları topladıqları tullantıları çeşidləyərək çayda ən çox müşahidə olunan zibilləri müəyyən ediblər. Tullantıların toplanması prosesini daha effektiv təşkil etmək məqsədilə sözügedən əraziyə texnika da cəlb olunub. Daha sonra, yığılan bütün tullantılar zibillik poliqonuna təhvil verilib.
Qeyd edək ki, Qarqar çayının sahilində keçirilən təmizlik aksiyasının əsas məqsədi ölkə ərazisində ətraf mühitin məişət və digər tullantılarla çirkləndirilməsinin qarşısının alınması, əhalinin tullantıların düzgün idarə edilməsi ilə ətraf mühitin neqativ təsirlərdən qorunması istiqamətində maarifləndirilməsi, o cümlədən insanların ətraf mühitin mühafizəsinə münasibətini ekoloji vəziyyətin yaxşılaşdırılmasında ictimaiyyətin rolunu artırmaq və bu sahədə ictimai əməkdaşlığı gücləndirməkdir.
