Ağcabədidə “Sağlamlığa doğru qaç”adlı qaçış yarışı keçirilib

Öncə rayon rəhbəri, habelə təşkilatçı qurumların nümayəndələri, hüquq mühafizə orqanlarının rəhbərləri və YAP Ağcabədi rayon təşkilatının sədr müavini, səhiyyə işçiləri Ulu öndər Heydər Əliyevin adibəsini ziyarət edərək önünə çiçək dəstələri düzüblər.

Ağcabədi Rayon Mərkəzi xəstəxanasının həyətində keçirilən tədbirdə tədbirin medoratoru Toğrul Səfərov iştirakçıları salamladıqdan sonra Azərbaycan Respublikasının Dövlət Himni səsləndirilib. Torpaqlarımızın azadlığı uğrunda canını fəda etmiş Vətən şəhidlərinin xatirəsi bir dəqiqəlik sükutla yad olunub.

“Konstitusiya və Suverenlik İli” çərçivəsində keçirilən yarışda əsas məqsəd, eləcə də qarşıdan gələn “17 İyun – Tibb işçilərinin Peşə bayramı” münasibətilə tibb işçilərinin fiziki sağlamlığının təşviq edilməsi, onların asudə vaxtlarının səmərəli təşkili, həmkarlar arasında birliyi gücləndirmək, həm idman etmək, həm də yeni dostlar qazanmaq olub.

Yarışda Ağcabədi Rayon Mərkəzi Xəstəxanasının kollektivi, həmçinin Cəbrayıl, Laçın, Ağdam, Füzuli, Bərdə, Tərtər və Beyləqandan olan həkimlər, tibb bacıları, tibb müəssisələrində işləyən və təhsil alan tələbələr iştirak ediblər.

Çıxış edən Ağcabədi Rayon İcra Hakimiyyətinin başçısı Rafil Hüseynov müqəddəs Ramazan bayramı münasibətilə hər kəsi təbrik edib, iştirakçılara can sağlığı, işlərində uğurlar arzu edib. Digər çıxış edənlər – Azərbaycan Səhiyyə İşçiləri Həmkarlar İttifaqı Respublika Komitəsinin sədri Elnarə Muradova, Azərbaycan Həmkarlar İttifaqı Konfederasiyasının sədr müavini Əbil Ağasiyev, Ağcabədi Rayon Mərkəzi Xəstəxanası Publik Hüquqi Şəxsin direktoru Elnur Abdullayev və Qarabağ Regional Gənclər və İdman idarəsinin Ağcabədi rayonu üzrə Gənclər və İdman sektorunun baş məsləhətçisi Eldəniz Qəmbərov “Sağlamlığa doğru qaç”adlı layihənin olduqca vacib əhəmiyyətə malik olduğunu, səhiyyə işçilərinin də bu layihəyə böyük həvəslə qatıldıqlarından danışaraq yarış iştirakçılarına uğurlar arzu ediblər. Bundan sonra yarışa start verilib. 5 km məsafəni qət edən və ilk üçlüyü əldən verməyən qadın iştirakçıların hər üçü ağcabədili səhiyyə işçiləri olub. Belə ki, finiş xəttinə hamıdan tez çatan Türkanə Quliyeva I, Tünzalə Abdullayeva II, Gülşən Ağayeva isə III yerə layiq görülüblər. Gərginliyi ilə yadda qalan kişilərin mübarizəsində isə I yerə Cəbrayıl rayonunu təmsil edən Məmiş Əsədov, hər ikisi Ağcabədi təmsilçisi olmaqla II yerə İslam Həsənov, III yerə isə Ayət İsmayılov layiq görülüblər.

Qalib kişi və qadın iştirakçılara yarışın diplom və hədiyyələri, eləcə də müvafiq olaraq 1 yer üçün 500, II yer üçün 300, III yer üçün isə 200 manat pul mükafatları təqdim olunub. Qadınlar arasında birincilik əldə edən Türkanə Quliyevaya əlavə olaraq Ağcabədi Rayon İcra Hakimiyyəti başçısının qiymətli hədiyyəsi də təqdim olunub.