Ağcabədidə intellektual oyun üzrə rayon müsabiqəsi keçirilib
28 aprel 2023 | 16:26
Aprelin 27- də Ağcabədi Rayon Gənclər və İdman İdarəsinin və Yeni Azərbaycan Partiyası Ağcabədi rayon təşkilatının birgə təşkilatçılığı ilə Üzeyir Hacıbəyli adına Qarabağ Muğam Mərkəzində Ulu öndər Heydər Əliyevin anadan olmasının 100 illik yubileyinə həsr olunmuş intellektual oyun üzrə rayon müsabiqəsi keçirilib
Müsabiqədə YAP Ağcabədi rayon təşkilatının sədri Rövşən Əhmədov, Rayon İcra Hakimiyyətinin əməkdaşı Sərraf Nağıyev, Rayon Gənclər və İdman İdarəsinin rəis müavini Eldəniz Qənbərov və başqaları iştirak edib.
Öncə ulu öndər Heydər Əliyevin və Vətənimizin azadlığı uğrunda canından keçən şəhidlərimizin əziz xatirəsi bir dəqiqəlik sükutla yad olunub, Azərbaycan Respublikasının Dövlət himni səsləndirilib.
Açılış mərasimində YAP Ağcabədi rayon təşkilatının sədri Rövşən Əhmədov çıxış edərək, ulu öndərimiz Heydər Əliyevin keçdiyi böyük, mənalı və şərəfli həyat yolundan ətraflı bəhs edib.
Sonda Rayon Gənclər və İdman İdarəsinin rəis müavini Eldəniz Qənbərov intellektual oyun üzrə rayon müasbiqəsinin keçirilmə qaydaları ilə bağlı iştirakçıları ətraflı şəkildə məlumatlandırıb.
Daha sonra müsabiqəyə start verilib. Müsabiqədə hər komandada 5 əsas, 2 ehtiyat oyunçu olmaqla, 16 komanda atılmış püşk əsasında 4 qrupa bölünərək mübarizə aparıb. Qruplarda birinci yeri tutmuş komandalar arasında final oyunu keçirilib.
Gərgin və maraqlı intellekt savaşı ilə keçən müsabiqənin yekun nəticələrinə əsasən Şirin Hüseynov adına Ağcabədi şəhər 2 saylı tam orta məktəbinin komandası I yerə, Məmməd Əsədov adına şəhər 5 saylı tam orta məktəbin komandası II yerə, Ağcabədi rayon Hacıbədəlli və Rəncbərlər kənd tam orta məktəbin komandaları isə III yerə laiq görülüb. Qalib gəlmiş komandalara təşkilatçılar tərəfindən diplom və medallar təqdim olunacaq.
Keçidlər
