Ağcabədidə 1 Oktyabr – Prokurorluq işçilərinin peşə bayramı günü münasibəti ilə tədbir keçirilib.
01 oktyabr 2024 | 18:12
Ağcabədi rayonunda 1 Oktyabr – Prokurorluq işçilərinin peşə bayramı günü münasibəti ilə tədbir keçirilib.
Tədbirdə Ağcabədi Rayon İcra Hakimiyyətinin başçısı, hüquq-mühafizə orqanlarının rəhbərləri, rayon icra hakimiyyətinin hüquq şöbəsinin müdiri, Səfərbərlik və Hərbi Xidmətə Çağırış üzrə Dövlət Xidməti Ağcabədi rayon şöbəsinin rəisi , rayon ərazisində yerləşən hərbi hissə komandirləri və media nümayəndələri iştirak ediblərlər.
Öncə Ağcabədi Qəhrəmanlar Parkında şəhidlərimizin xatirəsinə ucaldılmış abidə kompleksinin önünə qərənfillər düzülüb, şəhidlərimizin xatirəsi ehtiramla yad edilib.
Tədbir iştirakçıları bundan sonra Ulu öndər Heydər Əliyevin abidəsini ziyarət edərək önünə tər çiçəklər düzüblər.
Ziyarət Heydər Əliyev Mərkəzində davam edib. Burada iştirakçılara eksponatlar əsasında Ümummilli lider Heydər Əliyevin həyat və fəaliyyəti, uğurlu siyasəti haqqında geniş məlumat verilib.
Daha sonra Ağcabədi Rayon Prokurorluğunda geniş tədbir keçirilib.
Öncə Ağcabədi Rayon İcra Hakimiyyətinin başçısı Rafil Hüseynov çıxış edib. O, bildirib ki, prokurorluq orqanları dövlətin əsas sütunlarından biri olaraq ictimai-siyasi sabitliyin qorunmasında, qanunçuluğun təmin olunmasında böyük rol oynayır. Bütün prokurorluq işçilərini peşə bayramı münasibətilə təbrik edən icra başçısı daha sonra Ağcabədi rayon prokuroru Vüqar Hacıyevi və bir bir qrup əməkdaşı rayon icra hakimiyyətinin fəxri fərmanları ilə təltif edib.
Bundan sonra Ağcabədi rayon prokuroru Vüqar Hacıyev çıxış edib. O, Azərbaycanda prokurorluq orqanlarının tarixi, fəaliyyəti, o cümlədən Azərbaycana rəhbərliyi dövründə Ulu Öndər Heydər Əliyev tərəfindən bu orqanların daim diqqət mərkəzində saxlanması ilə bağlı ətraflı məlumat verib. Rayon prokuroru çıxışında həmçinin Baş prokurorluğun əməkdaşı, vaxtından əvvəl növbəti xüsusi rütbə almış Seyid-Əzim Ağayevi və Ağcabədi rayon prokurorunun köməkçisi, baş prokurorun adından təşəkkür almış Rəşid Mansırovu təbrik edib.
Biz də öz növbəmizdə qanunlarımızın keşiyində dayanan prokurorluq işçilərini peşə bayramları münasibətilə təbrik edir, çətin və şərəfli işlərində uğurlar arzulayırıq.
Keçidlər
