Ağcabədi Rayon İcra Hakimiyyətinin başçısı Rafil Hüseynovun səyyar qəbul-görüşü Hüsülü kəndində keçirilib
Vətəndaş müraciətlərinə həssaslıqla yanaşılıb və qaldırılan məsələlərin dəqiq araşdırılıb həllinə nail olunması ilə bağlı dövlət başçısı İlham Əliyevin qarşıya qoyduğu tapşırıq və vəzifələr Ağcabədi Rayon İcra Hakimiyyətinin gündəlik fəaliyyətinin əsasını təşkil edir.
Bununla əlaqədar rayon icra hakimiyyətinin başçısı Rafil Hüseynov vətəndaş qəbulu qrafikinə uyğun olaraq növbəti səyyar görüşü rayonun Hüsülü kəndində keçirib.
I Qarabağ müharibəsi şəhidi Cavad Həsənovun adını daşıyan məktəbin həyətində təşkil olunan səyyar qəbulda hüquq-mühafizə orqanlarının və xidməti təşkilatların rəhbərləri, rayon icra hakimiyyətinin məsul işçiləri, şəhid ailələri, qazilər, kənd sakinləri,eləcə də yerli media nümayəndələri iştirak ediblər.
Ağcabədi Rayon İcra Hakimiyyətinin başçısı Rafil Hüseynov çıxışında qeyd edib ki, rayonun yaşayış məntəqələrində davamlı olaraq vətəndaşlarla görüşlər keçirilir, onların müxtəlif məsələlərlə bağlı müraciətlərinin, ərizə və şikayətlərinin həll olunması üçün müvafiq tədbirlər görülür.
Vətən müharibəsində əldə olunan qələbə, işğaldan azad olunmuş ərazilərdə, həmçinin rayonda həyata keçirilən abadlıq-quruculuq işləri, eləcə də qarşıda duran vəzifələr haqqında məlumat verən rayon rəhbəri bunlarla yanaşı rayonun kənd və qəsəbələrində, o cümlədən Hüsülü kəndində sakinlərin mövcud problemlərinin daim diqqət mərkəzində saxlanıldığını və həlli istiqamətində müvafiq addımların atıldığını tədbir iştirakçılarının diqqətinə çatdırıb. Bununla yanaşı icra başçısı çıxışında hazırda kənd təsərrüfatı sahəsinə, xüsusən pambıq məhsullarının istehsalına önəm verildiyini və bu sahənin daha gəlirli olduğunu bildirib.
Həmçinin rayon rəhbəri kənd ərazisində vətəndaşlar tərəfindən aparılan qanunsuz tikililərə, bələdiyyə mülkiyyətində olan torpaqların zəbt olunması məsələlərinə toxunub və belə halların yolverilməzliyini qeyd edərək, bununla bağlı aidiyyəti üzrə öz tapşırıqlarını verib.
Sonra səyyari görüşdə söz alıb müraciət edən kənd sakinlərinin qaldırdıqları məsələlər və problemlər rayon rəhbəri tərəfindən xüsusi həssaslıqla dinlənilib, ünvanlanan suallara ətraflı cavablar verilib.
Kənd sakini Vasif Mirzəyev müraciətində 20 hektar torpaq sahəsində pambıq əkdiyini, suvarmada çətinliklərin olduğunu və həmin ərazidə olan 1 ədəd batmış subartezian quyusunun bərpa olunması, kənd sakini, Vətən müharibəsi iştirakçısı Xəyal Nəzərov ona bələdiyyədən əkinaltı torpaq sahəsinin verilməsi, kənd sakini Bəşir Sadıqov pay torpaq sahəsi daxil olmaqla ərazidə olan 35 hektar əkinaltı torpaq sahəsini suvarma suyu ilə təmin edən, batmış 1 ədəd subartezian quyusunun bərpa olunması, məktəb direktoru Baxış Baxışov isə C.Həsənov adına Hüsülü kənd tam orta məktəbinin əsaslı təmirinə köməklik göstərilməsi barədə xahiş ediblər.
Vətəndaş qəbulunda qaldırılan məsələlərlə əlaqədar aidiyyəti üzrə cavabdeh olan qurumlara, idarə və təşkilatlara lazımi göstərişlər və tapşırıqlar verib.
