Ağcabədi Rayon İcra Hakimiyyətinin başçısı Rafil Hüseynovun Şahsevən kəndində səyyar qəbul-görüşü keçirilmişdir.
20 may 2026 | 10:25
Mayın 20-də Ağcabədi rayonunun Şahsevən kəndində Ağcabədi Rayon İcra Hakimiyyəti başçısının səyyar qəbulu keçirilib. Hüquq-mühafizə orqanlarının, aidiyyəti idarə, müəssisə və təşkilat rəhbərlərinin iştirak etdiyi görüşdə rayon icra hakimiyyətinin başçısı Rafil Hüseynov çıxış edib.
İcra başçısı son dövrlərdə təbiət hadisələrinin təsərrüfata vurduğu gözlənilməz zərərlərdən danışaraq, bu baxımdan icra nümayəndələrinin və bələdiyyələrin daha ayıq-sayıq fəaliyyət göstərməsinin vacibliyini vurğulayıb.
Daha sonra sakinlərin müraciət və təklifləri dinlənilib. Qəbul iştirakçıları əsasən kəndin yeniyetmə və gənclərinin futbol oyunları üçün orta məktəbin idman meydançasından istifadəsinə şərait yaradılması, sosial yardımın alınmasında yaranan çətinliklərin aradan qaldırılması, içməli su problemi və digər məsələləri qaldırıblar.
Bildirilib ki, məktəbin idman meydançasından istifadənin təmin olunması üçün həmin vaxtlarda təhlükəsizlik və təmizlik qaydalarına nəzarət edəcək məsul şəxsin müəyyənləşdirilməsi vacibdir. Kənd bələdiyyəsinin sədri isə qeyd edib ki, kənd ərazisində əlavə futbol meydançasının yaradılması üçün uyğun yer mövcuddur və maliyyə ayrıldıqdan sonra bu istiqamətdə işlərə başlanılması nəzərdə tutulur. Həmin müddətədək məktəbin meydançasından istifadənin təşkili məqsədilə əlavə nəzarətçi ayrılacağı bildirilib.
Görüş zamanı səsləndirilən digər məsələlər ətrafında da aidiyyəti qurumlarla fikir mübadiləsi aparılıb, müvafiq tapşırıq və tövsiyələr verilib.
Keçidlər
