Ağcabədi Rayon İcra Hakimiyyətinin başçısı Rafil Hüseynovun növbəti səyyar qəbul-görüşü İmamqulubəyli kəndində keçirilib
Azərbaycan Respublikasının Prezidenti İlham Əliyevin dövlət qurumları rəhbərlərinin əhali ilə görüşlərinin keçirilməsinə dair tapşırığına uyğun olaraq, rayonun İmamqulubəyli kəndində sakinlərlə növbəti görüş keçirilib.
Səyyar qəbulda hüquq mühafizə orqanlarının,idarə, müəssisə və digər xidmət təşkilatlarının rəhbərləri, rayon icra hakimiyyətinin məsul şəxsləri, şəhid ailələri, qazilər,kənd sakinləri və yerli mətbuat nümayəndələri iştirak ediblər.
Öncə torpaqlarımızın ərazi bütövlüyü uğrunda canlarını fəda etmiş qəhrəman Vətən oğullarının əziz xatirəsi iştirakçılar tərəfindən dərin ehtiramla yad olunub.
Rayonda həyata keçirilən ifrastruktur layihələr, qısa müddət ərzində görülən işlər və qarşıda duran vəzifələr barədə geniş söz açan rayon rəhbəri eyni zamanda rayonun kənd və qəsəbələrində əhalinin artımı ilə əlaqədar müəyyən problemlərin, xüsüsən işsizliyin, suvarma suyunda çətinliklərin yarandığını, həmin məsələlərin dövlət strukturları tərəfindən daim diqqət mərkəzində saxlanıldığını, araşdırıldığını və həlli istiqamətində müvafiq addımların atıldığını görüş iştirakçılarının diqqətinə çatdırıb.
Sonra sakinlərin müraciət və problemləri xüsusi həssaslıqla dinlənilib, rayon rəhbəri Rafil Hüseynov kənd sakinlərinin sualların ətraflı cavablandırıb.
Çıxış edən kənd sakinləri: Həqiqət Zeynalova övladının, Sabit Mikayılov həyat yoldaşının işlə təmin olunması, Pənah Nəcəfov krant artezianın bərpa olunması, İlhamə Qasımova, Bahəddin Kərimov suvarma suyunda çətinliklərin olduğunu, Cəvahir Kərimova hərbçi övladının fərdi yaşayış evinə qaz çəkilməsini, Sevinc Kazımova özünüməşğulluq proqramı xətti ilə mal-qara alması, Behbud Kərimov kəndin mərkəzində olan içməli su artezianının bərpa olunması, kənd körpələr evi-uşaq bağçası üçün yeni binanın tikilməsini, Təranə Soltanova, Göyçək Kərimova isə ünvanlı sosial yardım almaq üçün lazımi köməkliyin göstərilməsini xahiş ediblər.
Səyyar qəbulda qaldırılan bəzi məsələlər yerindəcə öz həllini tapıb, digər problemlərin həlli üçün isə müvafiq göstərişlər və tapşırıqlar verilib.
