Ağcabədi Rayon İcra Hakimiyyətinin başçısı Rafil Hüseynovun növbəti səyyar qəbul-görüşü Hindarx qəsəbəsində keçirilib

Ağcabədi Rayon İcra Hakimiyyətinin başçısı Rafil Hüseynovun  2023-cü ildə növbəti  səyyar qəbulu fevralın 1-də rayonun Hindarx qəsəbəsində keçirilib.

Qəbulda hüquq-mühafizə orqanlarının, səhiyyə, təhsil, mədəniyyət, digər xidmət təşkilatlarının rəhbərləri, ərazi icra nümayəndəsi, kənd bələdiyyəsinin sədri, yerli mətbuat nümayəndələri   və  kənd sakinləri iştirak ediblər.

İcra başçısı öz çıxışında qəsəbənin gələcək üçün böyük perspektivlərə malik olmasından danışıb, burada sahibkarlıq subyektlərinin, istehsal sahəsinin yaradılmasının  vacibliyini vurğulayıb. Rayon rəhbəri həmçinin gələcəkdə burada sənaye obyektlərinin tikilməsi üçün dəstək verilə biləcəyini də diqqətə çatdırıb.

Qəsəbədə şəhər mühitinin yaradılması üçün  müvafiq işlərin görülməsinin əhəmiyyətindən danışan natiq buradakı  məktəb binalarının, körpələr evi-uşaq bağçasının, xəstəxana binasının hazırkı vəziyyəti, həmçinin 3 məktəbin yalnız birinin tam orta məktəb olması ilə bağlı narahtlığını bildirib, bununla bağlı  müvafiq addımların atılmasının lazım olduğunu qeyd edib.

Sonra söz qəbul iştirakçılarına verilib. Qəsəbə sakinlərinin çıxışlarında  artezian quyusunun xarab olmuş su nasosunun təmiri,  küçələrin işıqlandırılması, qəsəbədəki park  ərazisində sanitar qovşağın tikilməsi və digər məsələlərlə bağlı fikir və təkliflər  yer alıb.

Sakinlər həmçinin  vətəndaşların problemlərinin həllinə həssaslıqla yanaşıldığına, şəhid ailələri  və qazilərə   göstərilən diqqət va qayğıya görə  dövlət başçısına öz minnətdarlıqlarını ifadə ediblər.