Ağcabədi rayonu Aşağı Avşar kəndində mavi yanacağın verilməsi ilə əlaqədar açılış olmuşdur.

20 aprel 2013-cü  il tarixdə saat 11:00 –da Ağcabədi rayonu Aşağı Avşar kəndində mexaniki sayğac quraşdırılmış 420 abonentə mavi yanacağın verilməsi ilə əlaqədar açılış olmuşdur.
    Açılış mərasimində Azəriqaz İstehsalat Birliyi Tikinti Departamentinin rəisi Ramil İsgəndərov, Azəriqaz  İstehsalat Birliyi Tikinti Departamentinin rəis müavini Fuad Şükürov və Azəriqaz İstehsalat  Birliyi  Tikinti Departamentinin əməkdaşı Tahir Kazımov  iştirak etmişdir.
   Tədbiri Ağcabədi Qaz İstismarı Sahəsinin rəisi İkram  Məhərrəmov açmış və qeyd etmişdir ki, hal-hazırda Azərbaycanın bütün bölgələrində olduğu kimi Ağcabədi rayonunda da inkişaf yüksək səviyyədə gedir. Əhalinin həyat şəraitinin yüksəldilməsi üçün dövlətimiz tərəfindən xeyli işlər görülür və sürətlə başlayan inkişaf nəticəsində ölkəmiz lider ölkələr sırasında bayrağını qürurla dalğalandırır.
Bunun da bariz nümunəsidir ki, bu gün Aşağı Avşar kəndinə təbii qazın verilməsi təmin olunmuşdur. Kəndin bütün əhalisinin mavi yanacaq ilə təmin olunması bütün regionlarımızda dövlətimiz tərəfindən həyata keçirilən modern inkişaf və müasirləşmə imkanlarının sübutudur və əhaliyə dövlət qayğısının bariz nümunəsidir. Bizim üçün yaradılan bütün imkanlar üçün Azərbaycan Respublikasının Prezidenti İlham Əliyev cənablarına və rayon İcra Hakimiyyətinin başçısı cənab Şahin Məmmədova minnətdarlığımızı bildiririk.
    Tədbirdə çıxış edən Ağcabədi rayon İcra Hakimiyyətinin Başçısı cənab Şahin Məmmədov bildirmişdir ki, son illərdə Respublikamızda, eləcə də rayonumuzda Dövlət qayğısının nəticəsi olaraq əhalinin həyat şəraitinin yaxşılaşdırılması baxımından, problemlərinin aradan qaldırılması üçün xeyli işlər görülmüşdür.
    Rayon rəhbəri qeyd etmişdir  ki, Azərbaycanda davamlı iqtisadi artım və yüksək sosial rifah, səmərəli dövlət idarəetməsi və qanunun aliliyi, insanların bütün hüquq və azadlıqlarının tam təmin olunması və vətəndaş cəmiyyətinin ölkənin ictimai həyatında fəal statusu ilə səciyyələnən inkişaf mərhələsinə nail olması bu gün dövlətimizin əsas inkişaf meyarlarını səciyyələndirən amillərdən biridir.
  Çıxışının sonunda Ağcabədi rayon İcra Hakimiyyətinin Başçısı cənab Şahin Məmmədov Azərbaycan Respublikasının Prezidenti İlham Əliyev cənablarına diddət və qayğıya görə rayon əhalisi və öz adından minnətdarlığını bildirmişdir.
    Tədbirdə Aşağı Avşar kəndinin ağsaqqalları və ziyalıları, qonaqlar çıxış edərək göstərilən diqqət və qayğıya görə Azərbaycan Respublikasının Prezidenti İlham Əliyev cənablarına və rayon İcra Hakimiyyətinin Başçısı Şahin Məmmədova minnətdarlıqlarını bildirmişlər. Çıxış edənlər bildirdilər ki, 2013 – cü il Prezident seçkilərində bizi məsuliyyətli bir sınaq ili gözləyir. Sizi əmin edirik ki, bundan sonra da üzərimizə düşən vəzifələrin öhdəsindən layiqincə gələcəyik və seçkilərdə  hər zaman ki, kimi düzgün seçimimizi edəcəyik.
   Açılışda 550 nəfər iştirak etmişdir.