Şəhid əsgərin layiq görüldüyü medal anasına təqdim olunub
Milli Ordunun əsgəri Qarayev Dilsuz Məmmədağa oğlunun ölümündən sonra təltif olunduğu “Hərbi xidmətdə fərqlənməyə görə” 3-cü dərəcəli medalı ailə üzvlərinə təqdim olunub.
Bu münasibətlə Ağcabədi rayonunun Hindarx qəsəbəsində keçirilən mərasimdə rayon icra hakimiyyətinin, N saylı hərbi hissənin, idarə, müəssisə, təşkilatların rəhbərləri, ağsaqqallar, gənclər və kənd ictimaiyyətinin nümayəndələri iştirak ediblər.
Mərasimdə çıxış edən Ağcabədi Rayon İcra Hakimiyyəti başçısının müavini,İctimai-siyasi və humanitar məsələlər şöbəsinin müdiri Naibə Mustafayeva son illər ölkəmizdə ordu quruculuğu istiqamətində görülən işlərdən danışıb. Azərbaycan Prezidenti, Ali Baş Komandan İlham Əliyevin qayğı və diqqəti nəticəsində Milli Ordumuzun Cənubi Qafqaz regionunda ən güclü orduya çevrildiyini vurğulayan natiq cəbhə bölgəsində düşmənin təxribat əməllərinin qarşısının layiqincə alındığını diqqətə çatdırıb.
Daha sonra şəhid Dilsuz Qarayevin layiq görüldüyü medal anasına təqdim olunub. Şəhid əsgərin anası oğlunun xatirəsinin əziz tutulduğuna, ailəsinə göstərilən qayğıya görə dövlətimizin başçısına minnətdarlığını bildirib.
