Gənc Heydərçilərin iştirakı ilə "Xocalı soyqırımı əsrin faciəsi, xalqımızın qan yaddaşıdır" başlığı altında tədbir keçirilmişdir

24  Fevral  2016-cı il  tarixdə  Heydər Əliyev  Mərkəzinin, Gənclər  və  İdman  İdarəsinin, Yeni Azərbaycan Partiyası  Ağcabədi  rayon  təşkilatının,  "Heydər Əliyev  Siyasi  İrsinin  öyrənilməsi  və təbliği  qurupu"nun  və  Ağcabədi  Pedoqoji  kollecinin  təşkilatçılığı  ilə   Heydər Əliyev Mərkəzində  “Xocalı soyqırımı əsrin  faciəsi - xalqımızın qan  yaddaşıdır" başlığı altında  tədbir  keçirilmişdir. Öncə  Xocalı soyqırımı qurbanlarının xatirəsi bir dəqiqəlik sükutla yad edildi.
    Tədbirdə Yeni Azərbaycan Partiyası Ağcabədi rayon  təşkilatının  sədr  müavini, Gənclər və İdman  İdarəsinin   rəis müavini  Eldəniz  Qəmbərov, Heydər  Əliyev  Mərkəzinin  direktoru  Məhsəti  Musa, Ağcabədi Pedoqoji Kollecinin direktor müavini Rövşən Bayramov  çıxış  edərək  1992-ci ilin  fevral  ayının  25-dən 26-sına  keçən  gecə  erməni  işğalçıları, habelə  uzun  müddət  beynəlxalq  ictimaiyyətə "sülhsevər" ordu  kimi təqdim  edilmiş  keçmiş  sovet ordusunun  366-cı motoatıcı  alayı  Xocalı  şəhərini  sakinləri  ilə  birlikdə  məhv  edərək  insanlığa  silinməz  ləkə  olan  soyqırımı   törətdiklərini  qeyd etmişdirlər. Həmçinin vurğulanmışdır ki,  1994-cü il fevralın  24-də  Ulu  Öndər  Heydər  Əliyevin  təşəbbüsü  ilə  Milli  Məclis  tərəfindən   "Xocalı Soyqırımı günü haqqında" qərar qəbul  edilmişdir və bununla da BMT  və dünya  dövlətlərinə  soyqırımın  gerçək   mahiyyəti açıqlanmış, beynəlxalq  ictimaiyyət erməni  terrorizminə  qarşı  təsirli  tədbirlər görməyə  çağrılmışdır.