Azərbaycan Respublikasının Prezidenti İlham Əliyev xalqa müraciət etmişdir

Azərbaycan Respublikasının Prezidenti İlham Əliyev oktyabrın 17-də xalqa müraciət edib. Müraciətdə qeyd olunub ki, Ermənistanın faşist rəhbərliyinin hərbi cinayəti sivil dünyanın qəzəbinə səbəb olmalıdır. Gəncə və Mingəçevir şəhərlərinin raket atəşinə tutulması nəticəsində mülki əhali həlak olub, yaralanıb. Bütün sivil dünya qüvvələri rəsmi Yerevanın Azərbaycanda mülki əhaliyə qarşı insanlığa sıxışmayan əməllərin şahididir. Oktyabrın 17-də gecə saat 01:00 radələrində Ermənistan Azərbaycanın Gəncə şəhərini ballistik raket atəşinə tutub. Azərbaycanın ikinci böyük şəhəri olan və cəbhə xəttindən çox uzaqda yerləşən Gəncə şəhərinə sayca üçüncü dəhşətli hücum ciddi sayda mülki insanların itkisinə səbəb olub, 14 nəfər, o cümlədən 2 uşaq həyatını itirib, 55 dən çox insan ciddi yaralanıb. Baş verənlər Azərbaycana, ümumbəşəri dəyərlərə və insanlığa qarşı cinayətdir.
Dövlət başçısı bildirib ki, Şuşaya və Qarabağın digər şəhərlərinə Livandan, habelə başqa ölkələrdən ermənilərin gətirilməsi və məskunlaşdırması hərbi cinayətdir, habelə Cenevrə Konvensiyasına ziddir. 30 il ərzində erməni vəhşilərinin əlində qalmış yaşayış məkanlarımız amansızcasına dağıdılıb. Bütün binalar və dini abidələrimiz sökülüb. Odur ki, Füzuli şəhərinin qalıqları erməni faşizminin təzahürüdür və erməni faşizminin şahididir.
Bank rezervlərində valyuta ehtiyatları cəmi 1,5 milyard dollar təşkil edən, xarici dövlət borcu ümumi daxili məhsulunun 60-70 faizini təşkil etdiyi Ermənistanın müharibəni aparmaq üçün silah və texnikanı hansı yollar ilə əldə etməsi böyük suallar doğurur. Azərbaycan xalqının bu açıq qalmış suallara cavab tələb etməyə haqqı var.
Ermənistan əhalisi kriminal rejimin başçılarını məsuliyyətə cəlb etməlidir. Ermənistanda hərbi komissarlıqlarda təşkil olunan mitinqlər artıq onu deməyə əsas verir ki, onlar həqiqəti dərk ediblər və bu cinayətdə iştirak etmək istəmirlər. Erməni xalqı öz cinayətkar xunta rejimi başçılarını məsuliyyətə cəlb edəcəkdir.

Füzulinin işğaldan azad olunmasını qeyd edən dövlətimizin başçısı bu hadisəni qələbənin müjdəsi adlandırıb. Göstərib ki, Füzuli əməliyyatı rəmzi məna daşıyır. Füzuli qədim yaşayış məskənimizdir, onun qaytarılması minlərlə insanın o yerlərə qayıtması deməkdir. Strateji nöqteyi-nəzərdən Füzulinin təmas xəttində yerləşən bir neçə müdafiə xəttinin yarılması yeni strateji üstünlükləri bəxş edir.
Azərbaycan ordusu tərəfindən məhv edilmiş Ermənistan silahlı qüvvələri döyüş mövqələrini və texnikanı bir hissəsini qoyub qaçır. Azərbaycan Ordusu tərəfindən döyüşlərdə 234 ədəd tank məhv edilib, 36 tank hərbi qənimət kimi götürülüb, piyadaların döyüş maşının 49-u məhv edilib, 24-ü hərbi qənimət kimi götürülüb. 16 ədəd özüyeriyən artilleriya qurğusu məhv edilib, 190 müxtəlifçaplı toplar, 2 “Uraqan” sistemi, 1 TOS odsaçan, əməliyyat taktiki raket kompleksi 2 “Elbrus”, 1 “Toçka-U”, 35 OSA zenit raket kompleksi, 3 TOR zenit-raket kompleksi, 5 KUB və “Kruq” zenit raket kompleksi, 9 radioelektron mübarizə sistemləri, 2 S-300 zenit raket kompleksi, 196 yük avtomobilləri məhv edilib, 98 avtomobil qənimət kimi götürülüb. Füzuli uğrunda ağır döyüşlər haqqında kitablar və əsərlər yazılacaq.
Böyük peşəkarlıq, məharət, şücaət, fədakarlıq nümayiş etdirmiş ordumuz haqqı bərpa edir. Müzəffər Azərbaycan Ordusu şərəfli missiyanın öhdəsindən gələ bilir. Qısa müddət ərzində Füzuli rayonunun əksər kəndləri və Füzuli şəhəri düşmənin tapdağından azad edilməsi böyük qələbəni xalqa daha da yaxın etdi. Strateji məntəqə və yüksəklikləri əldən edən ordumuz Ermənistanın hərbi-texniki potensialını böyük dərəcədə sıradan çıxara bilib. Ötən günlər ərzində məhv edilmiş və qənimət kimi götürülmüş texnikanın qiyməti təqribən 2 milyard dollar səviyyəsindədir.

Cənab Prezident vurğulayıb ki, Azərbaycan xalqının dönməz iradəsi və ordumuzun qəhrəmanlığı sayəsində işğal edilmiş bütün şəhər və kəndlərimiz qaytarılacaqdır. Azərbaycan hökuməti dağıdılmış şəhərləri yenidən quracaq və abadlaşdıracaqdır. İşğaldan azad olunmuş bütün ərazilərdə azan səsi eşidiləcək. Bu şərəfli missiyadır və ordumuz bu missiyanın öhdəsindən mütləq gələcəkdir. Çünki haqlı olan Azərbaycan Ordusu öz torpaqlarında vuruşur. Xalqımızın savaşı müqəddəs savaşdır! Ordumuz öz gücünü döyüş meydanında göstərir.
Cənab Prezident bunu da əlavə edib ki, bütün Azərbaycan xalqı dövlətimizin ən parlaq səhifəsini yazır. Azərbaycanda yaşanan həmrəylik, qarşılıqlı dəstək, birlik və ordumuzun qəhrəmanlığı bu şanlı tarixin səbəbidir. Xalqımız öz doğma dədə-baba torpaqlarını işğalçılardan azad edir. Müzəffər Azərbaycan Ordusu öz məqsədinə çatır və çatacaqdır. Azərbaycanın ərazi bütövlüyü bərpa ediləcəkdir. Heç bir qüvvə Azərbaycan xalqının iradəsi qarşısında duruş gətirə bilməz. Xalqımızın milli maraqları qorunacaqdır. Heç bir təhdid, heç bir hədə, heç bir təzyiq bizim iradəmizə təsir edə bilməz!
Azərbaycan məsuliyyətli ölkə olaraq düşmənin qısasını mülkü əhalidən götürmür. Öz siyasi ambisiyalarına görə dinc əhaliyə atəş açan Ermənistan dünyada sülhün düşmənidir. Bu cür əməllərinə görə Ermənistan rəsmilərinin cinayət məsuliyyətinə cəlb olunmaması sadəcə beynəlxalq riyakarlıq deyil, bu bəşəriyyətə qarşı törədilmiş cinayətdir. Rəsmi İrəvanın faşist əməllərinə göz yuman qüvvələr əslində onlar ilə məsuliyyəti bölüşmüş olurlar.